هذي قناعه توصلت لها مع مر السنين رغم اني كنت اعارضها في الماضي السحيق (اعقل يا الدينصور)
لكن من جد يا قووم .. مو لازم كل ماشفت شي تعلق عليه .. احياناً من الافضل انك تسكت لعده اسباب
اولاً / مو كل شي مختلف عن قناعاتك يكون غلط ... عشان كذا ليه ترد وتكسب عداوات انت في غنا عناها؟
ونرجع نقول.. الصمت حكمه
ثانياً/ ممكن تتغير نظرتك عن الموضوع بعد ماتتغير نفسيتك ... يعني لو عرض عليك موضوع او خبر معين وانت طفشان ممكن يكون لك رده فعل تختلف عن رده فعلك وانت رايق ... عشان كذا اترك التعليق الى ان تحس انك في جو يسمح لك بالنقاش
ونرجع نقول .. الصمت حكمه
ثالثاً / (يرحم ابووكم يا عيال تراني متحمس بالله ركوز معي ) احياناً صمتك يفسره المتلقي على هواه وهذا يعطيك حيز للتفكير والقيام بخطوه صحيحه مثلاً: ممكن يعتبر صمتك عدم فهم ... او ... قله خبره في هذا المجال ... او ... عدم تركيز في الموضوع نتيجه مشاغل وهواجيس ...او...رضا عن الموضوع بشكل لايترك مجال لك للتعقيب عليه
وهذي الخيارات ممكن تستفيد منها عشان تتهرب من الرد عن مالا يعجبك مما يطرح من نقاشات او مواضيع سااااااااااااااامجه بلا هدف .. وتكاد تكون متكرره 300 مره بصيغ متعدده .. ومن يطرحها يحس انه (جاب الذيب من ذيله) فبدال ماتتعب نفسك بالنقاش معه .. اسكت واعتبر انك ماسمعت ..او .. ماقريت شي
ونرجع نقول.. الصمت حكمه
رابعاً / الصمت يجنبك الحوارات الطويله والممله مع انسان جاهل او متعصب على وجهة نظره .. وقد يعتبرك في نهايه الحوار غاير منه او تكرهه شخصياً (الله لا يبلانا) عشان كذا ناظر فيه وابتسم واتركه
ونرجع نقوووول.. الصمت حكمه
عشان كذا يا قووم والله من جد الي قال الصمت حكمه هذا انساان عاش مع عالم متخلفه اتعبه كثر القاش معهم وكنه يعبي مويه في مشخل (يعني مافيه امل )
عشان كذا قرر ان الصمت حكمه ... واليوم انا قررت معه نفس الكلام
وفي النهايه نقول كما قال الشاعر (بدر السبيعي )
يبحل العاقل بعلمه مع الناس الغشم بالسلام ايرد لاخــاطبوه الجهّلي
التجارب عبره لمن يشوف ويفتهم والعقول ووزنهـا في يدين المعتلي
